Gin-anunsyo sang Department of Foreign Affairs (DFA) nga gin-appoint ang apat ka mga Filipino international law experts sa Permanent Court of Arbitration (PCA), ang inter-governmental organization nga amo ang naga-resolba sang mga international disputes.
Ini amo sanday Dr. Raul Pangalangan, Prof. Sedfrey Candelaria, Dr. Antonio Gabriel M. La Viña, kag Philippine Ambassador J. Eduardo Malaya.
Si Pangalangan nga Professor of Law sa University of the Philippines ang nakapungko man anay bilang Judge sa International Criminal Court (2015-2021).
Si Candelaria nga isa man ka Professor of Law sa Ateneo de Manila University amo ang chief sang Office of the Research, Publications and Linkages Office sa Philippine Judicial Academy.
Si La Vina naman ang nangin anay myembro sang PCA Specialized Panel of Arbitrators and Experts (Environmental Disputes) halin sang 2016-2022 kag subong nagapungko bilang Associate Director for Climate Policy and International Relations of the Manila Observatory.
Sa pihak nga bahin, si Malaya naman ang naga-serbe nga Philippine Ambassador to the Netherlands kag amo man ang Acting President sang PCA Administrative Council para sa 2023-2024.
Nahibaluan nga sa idalom sang 1899 kag 1907 Hague Convention for the Pacific Settlement of International Disputes, ang kada Member State ang mahimo mag-appoint sang tubtub apat ka mga indibidwal nga may “exceptional expertise” sa international law agud malakip sa lista sang magaserbe bilang arbitrators sa idalom sang PCA sa sulod sang anum ka tuig.
Antes ang apat, ang mga nagpungko nga Filipino members sa PCA amo sanday Chief Justice (ret) Artemio Panganiban, Chief Justice (ret.) Reynato Puno, Justice (ret.) Jose Vitug kag si Pangalangan.#
