ILOILO CITY- Kontento ang chairman sang Committee on Infrastructure sa Sangguniang Panlalawigan sa nangin paathag sang Department of Public Works and Highways may kaangtanan sa vertical displacement sa Ungka flyover.
Ini kasunod sang ginpatigayon nga joint committee hearing sang Committee on Infrastructure, bilang lead committee, nga ginapamunuan ni 4th Distriict Board Member Rolando Distura kag Committee on Transportation, Communication and Public Utilities nga ginapamunuan ni Ex-Officio Board Member Ramon Sullano.
Nagtambong sa hearing ang tiglawas naggikan sa Department of Public Works and Highways Region 6, National Economic and Development Authority, International Builders Corporation nga kontraktor sang proyekto, kag Local Government Unit sang Pavia.
Sa interview sang Bombo Radyo kay Board Member Distura, iya ginpahayag nga nasabat man ni Engineer Jose Al Fruto ,Assistant Regional Director sang Department of Public Works and Highways Region 6 ang pila ka pamangkot kag napaathag kun ngaa may natabo nga vertical displacement.
Suno kay Distura,ang ila rekomendasyon sa ahensya kag sa kontraktor amo ang pagpadasig sang ginapatigayon nga rehabilitation.
Sa amo man nga hearing, ginplastar sang Local Government of Pavia ang plano para sa rerouting bangud sa pagsirado sa flyover.
Sa interview sang Bombo Radyo kay Dante Dumaguing, head sang Traffic Management Division sang Pavia, iya ginpahayag nga gina-finalize pa ang nasambit nga rerouting.
Ginhingyo naman si Iloilo 2nd District Board Member Rolito Cajilig nga kun mahimo untaton lang anay ang pagpangdakop sa mga traffic violators bilang konsiderasyon sa mga motorista nga naga-adjust sa dalagan sang trapiko sa area.
