SIBUNAG, GUIMARAS – May mga daan na nga rekord sang pagmaoy kag pagpalupok sang pusil ang lalaki nga gin-aresto sang mga pulis sa Brgy. Oracon, Sibunag, Guimaras bangud sang kaso nga paghupot sang iligal nga armas.
Ang arestado amo si Fernando Treyes Jr., 52, residente sang nasambit nga lugar.
Sa interview sang Bombo Radyo kay Pol. Lt. Val Cambel, hepe sang Sibunag Municipal Police Station, iya ginpahayag nga nakuha sa balay sang biktima ang isa ka unit sang 38 caliber revolver nga may anum ka bala; isa ka black holster; isa ka black bullet pouch nga may 11 ka bala; kag isa ka bala sang 38 caliber revolver.
Ginapahayag nga may mga documented reports man sa barangay may kaangtanan sa mga reklamo sang pila ka residente batok sa arestado.
Preso na subong si Treyes sa Sibunag Municipal Police Station kag magapangatubang sang kaso nga paglapas sa Republic Act 10591 ukon Comprehensive Firearms and ammunition Regulation Act.
