ILOILO – Wala sang salakyan nga ginagamit ang 601st Regional Mobile Force Battalion sa pagpatigayon sang ila nga mga operasyon.
Ini ang natukiban sa committee hearing sang Committee on Public Order and Safety kag Committee on Disaster Risk Reduction and Management sa Sangguniang Panlalawigan.
Ang amo nga committee hearing ang nagasentro sa pagtsekyar sa capability enhancement program, pagtukib sa suporta kag proseso sa deployment sang salakyan ukon equipment sa Philippine National Police, paghibalo sa pag-designar sang driver sang salakyan, kag pagtukib sa kapasidad sang probinsya kag local government unit sa rescue operation.
Ini ang kasunod man sa kamatayon sang apat ka miyembro sang 601st Regional Mobile Force Battalion matapos nga naaksidente ang ginasakyan nga truck sa Barangay Ginomoy, Alimodian, Iloilo sang Pebrero 29.
Sa committee hearing nga ginapangunahan ni Iloilo 3rd District Board Member Matt Palabrica, ginpahayag ni Pol. Lt. Col. John Limuel Villafranca, officer in charge sang 601st Regional Mobile Force Battalion, nga ginakabig na nga ‘beyond economic repair’ ukon guba na ang salakyan sang mga pulis sa Alimodian.
Suno kay Villafranca, nakadepende sa sitwasyon ang paggamit salakyan: kun kaisa, personal nga motorsiklo ang ginagamit sang pulis; kun kaisa, ginalakat na lang padulong sa destinasyon; kag sa tion naman sang operasyon, nagapanghulam lang sa local government unit ukon sa pribado nga mga indibidwal.
Ginapahayag nga masobra na isa ka tuig sugod sang natukod ang mobile force batallion sa Alimodian kag may yara sang masobra 70 ka personnel sa lugar.
