Posible nga naga-estar sa karon ang pugante kag anay kongresista nga si Zaldy Co sa isa ka bilyonaryo nga balay sa Élysées sa France suno kay DILG secretary Jonvic Remulla.
Suno kay Remulla ang amo nga balay ang may ara sang may 10 ka kuwarto kag nagabalor ini sang P14.18 bilyon.
Ang Champs-Élysées isa ka bantog nga lugar sa France kun sa diin nalinyahan ini sang mga dalagko nga kahoy kag mga mamahalon nga balaligyaan kaangay sang Christian Dior nga padulong sa Arc de Triomphe sa Paris, ang kapital sang France.
Nahibaluan nga asta sa karon ginapangita si Co bangud sang mga kaso sini nga ginapangatubang kaangay sang graft kag malversation nga may kaangtanan sa ginapatihan nga maanomaliya nga P289.5 milyon nga flood control project sa Oriental Mindoro.
Sang nagligad nga bulan, ginpahayag ni President Ferdinand Marcos Jr. nga nadakpan si Co sa pungsod Czech Republic matapos ini nagtabok pakadto sa Germany gamit ang indi valid nga travel documents.
Apang suno kay Remulla, ginbuy-an man si Co sang mga awtoridad sa Czech Republic matapos ang 72 hours.
Nauna na nga nagsiling ang Malacañang Palace nga nagkadto si Co sa France agud mangayo sang asylum.
Ginpahayag man ni Remulla nga may yara na sang pag-istoryahanay nahanungod sa pagpangabay sang gobyerno sang Pilipinas sa mga awtoridad sang France nga punggan ang asylum bid ni Co
