ILOILO – Handa na nga magpakigbahin ang 61st Infantry Battalion sang Philippine Army sa dululungan nga pagdonar sang dugo sa patigayunon nga Dugong Bombo 2019 sang Bombo Radyo sa palaabuton nga Nobyembre 16, 2019 sa lloilo Science and Technology University sa Burgos St., La Paz, Iloilo City.
Sa interview sang Bombo Radyo kay Lt. Col. Joel Benedict Batara, commander sang 61st Infantry Battalion sang Philippine Army iya ginpahayag nga nangin tradisyon na nila nga magpakigbahin sa mga programa sang Bombo Radyo nga nagabulig sa mga pumuluyo kaangay nalang sang Bombo Medico kag Dugong Bombo.
Suno kay Batara, nangin kaupod na nila ang Bombo Radyo sa ila katuyuan nga pagbulig sa isig kapareho indi lang sa paghatag sang insakto nga impormasyon lakip man ang paghatag sang medikal nga kinahanglan sang pumuluyo.
Dugang sang natungdan, isa man ini ka pamaagi sang Philippine Army nga pamatud-an ang ila sinseredad sa pagbulig sa mga pumuluyo.
Gin-agda naman ni Batara ang tanan nga magpakigbahin sa Dugong 2019 agud mas madamo pa ang mabuligan nga nagakinahanglan sang dugo.
