ILOILO CITY- Masobra pa sa 700 ka mga benepisyaryo sang first tranche sang fuel subsidy sa Iloilo ang wala gihapon naka-claim sang ila cash cards.
Sa interview sang Bombo Radyo kay Atty. Salvador Altura,legal kag hearing officer sang Land Transportation Franchising and Regulatory Board (LTRFB) Region 6, iya ginpahayag nga sa data nga ila gina-uyatan, sa masobra 1100 cash cards nga yara sa Land Bank of the Philippines, masobra 400 ka recepients pa lang ang naka-claim.
Suno kay Atty. Altura, padayon nila nga gina-trace ang mga recepients nga wala pa naka-avail sang ila fuel subsidy.
Gintumod naman niya ang pila sa posible rason kun ngaa wala naka-claim ang iban nga benepisyaryo.
Ginpahayag sang natungdan nga posible nga indi updated ang rehistro sang mga salakyan nga isa sa mga requirements agud maka-cliam sang subsidy.
Magluwas diri, posible man nga naglain na ang tag-iya sang salakyan bangud base sa guidelines, ang mahimo lang maka-claim amo ang ngalan sang operator nga yara sa record sang LTFRB.
Paathag ni Altura, kun lain na ang tag-iya ukon operator sang salakyan, kinahanglan sini nga mag-secure sang authorization gikan sa nauna nga operator nga yara sa record sang ahensya.
