Pasakaan na sang nagakaigu nga disciplinary actions si Negros Oriental Third District Representative Arnie Teves Jr. kun indi pa ini personal nga magpakita sa atubang sang Committee on ethics and privileges sa Kamara karon sa hapon.
Ginhatag ini nga ultimatum kay Teves matapos nga wala ginpasugtan nga makatambong paagi sa video conference kahapon sang hapon.
Suno kay committee chair Rep. Felimon Espares, extension na ini sang nauna na ginhatag nga lima ka adlaw kay Teves agud nga makabalik sa Pilipinas kag maka-report sa trabaho.
Natalana ang sunod nga hearing sang committee 4:00 ukon 5:00 karon sa hapon.
Wala na ginpatpat pa sang committee chair kun ano ang posible nga mga sanctions nga idagdag kay Teves kun magpakatig-a ini nga magpakita sa Batasan Complex.
Si Teves amo ang ginatudlo nga mastermind sa likod sang pagpatay kay Negros Oriental Governor Roel Degamo sang Marso 4 sa Pamplona, Negros Oriental kun sa diin nadalahig man ang walo ka iban nga mga sibilyan.
Apisar nga expired na ang iya nga travel authority sang nagligad nga Marso 9, wala gihapon ini nakapauli sa Pilipinas bangud suno sa iya nga legal team, nagakahangawa ini para sa iya nga seguridad kun magtapak ini sa pungsod.
‘SA SOUTHEAST ASIA’
Ginbuyagyag naman ni Justice Secretary Boying Remulla nga sa Southeast Asia lang nagatinir si Teves sang natapos na ang iya nga medical treatment.
Ginduso sini liwat kay Teves nga magpauli na kag atubangon ang sampaw-sampaw nga mga akusasyon batok sa iya.
Isa si Teves sa subject sa imbestigasyon sa Degamo killings gani maga-request ang Pilipinas sa International Criminal Police nga ibutang ini sa Blue Notice suno kay Remulla.
‘SUMUKO NA KAYO’
Bug-os nga pwersa na sang gobyerno ang nagahulag suno kay Special Task Force Degamo head kag Interior and Local Government Secretary Benhur Abalos gani mas maayo nga magsungka na lang ang nabilin pa nga mga suspek, antes maghulag ang mastermind kag posible nga sila pa ang pangpatyon.
Madumduman nga una na ginpahayag sang otoridad nga 10 ang ginalantaw nga suspek, samtang una naman nga ginpahayag ni Remulla nga posible nga 3-4 ka mastermind ang naghimbon agud nga mapapatay ang gobernador.
