ILOILO CITY- Ginakabig sang Communist Party of the Philippines (CPP) nga ulihi nga kaadlawan sa gwa sang presuhan ang 77th birthday celebration ni Presidente Duterte, kahapon,Marso 28.
Suno kay Marco Valbuena, chief information officer sang CPP, pila na lang ka bulan,sa pagpanaog ni Duterte sa iya official term bilang Presidente sang Republika sang Pilipinas, indi magduha-duha ang mga Filipino nga sukton siya sang indi maisip nga ‘crimes against humanity’ nga iya nakumiter.
Pahayag niya, ano man ang mangin resulta sang May elections, ipakigbato gid sang mga pumuluyo nga arestuhon si Duterte kag ipaatubang sa International Criminal Court ukon local courts sa diin siya pwede mapasakaan sang kaso.
Sang 2016, ginduso ni Duterte ang peace talks sa communist movement kag nag- appoint pa sa Left-leaning personalities sa gabinete.
Apang naglas-ay ang iya relasyon sa grupo sang gin-akusahan sang gobyerno ang padayon nga pag-atake sa tropa sang gobyerno sang New People’s Army sa pihak sang peace talks.
Sang 2019, gin-terminate ni Duterte ang negosasyon.
Dugang pa sang CPP, ginpalala man ni Duterte ang sitwasyon sang terorismo sa pungsod kag napaslawan ini nga depensahan ang marine resources sang Pilipinas batok sa China kag gintugutan man ang US kag Chinese forces nga magpahamtang sang military bases sa sovereign territory sang Pilipinas.
