ILOILO CITY – Nabaton na sang 80 ka mga Local Government Units sa Western Visayas ang pondo nga pagagamiton para sa social amelioration program sang Department of Social Welfare and Development nga bulig para sa mga apektado sang Coronavirus disease 2019.
Sa interview sang Bombo Radyo kay Evelyn Macapobre, regional director sang Department of Social Welfare and Development iya ginpahayag nga nagdangat sa masobra P5 bilyon ang na release nga pondo para sa mga Local Government Unit.
Ang mga masunod nga maga kabanhawanan sa probinsya sang Iloilo ang mga nakabaton na sang pondo para sa nasambit nga programa;
New Lucena nga nakabaton sang P24 milyon, Igbaras P31 milyon, Badiangan P26 milyon, Barotac Nuevo P51 milyon, San Enrique P30 milyon, San Joaquin P41 milyon, Dumangas P69 milyon, Miag ao P70 milyon, Estancia P41 milyon, Maasin P 36 milyon, Anilao P25 milyon, Dueñas P34 milyon, Oton P95 milyon, Passi P79 milyon, Alimodian P37 milyon, Ajuy P44 milyon, Tigbauan P63 milyon, Pototan P76 milyon, Zarraga P25 milyon, Iloilo City P400 milyon, Cabatuan P60 milyon, Calinog P55 milyon, Tubungan P21 milyon, Bingawan P14 milyon, Banate P28 milyon, San Rafael P30 milyon, Mina P23 milyon, Janiuay P60 milyon, Balasan P30 milyon, Barotac Viejo P40 milyon kag Guimbal P36 milyon.
Samtang wala pa nakapasa sang ila nga budget plan ang mga banwa sang Lemery, Carles kag Nueva Valencia, Guimaras.
Wala naman napirmahan ang budget plan sang Sta. Barbara, San Dioniso kag Concepcion, kag ginpabalik man ang iya sang Pavia kag San Jose Antique bangud sa kakulangan sa mga dokumento.
Base sa pagsulundan nga ginhatag sang Department of Social Welfare and Development nagakadapat nga mapanagtag na ang nasambit nga ayuda sa sulod sang lima ka adlaw nga magasugod na subong, samtang pito naman ka adlaw para sa mga malayo nga lugar.
Nakadepende naman sa mga Local Government Unit kun paano nila ini ipanghatag sa mga benepesyaryo apang nagakadapat man nga siguraduhon nga gina sunod ang mga pasulundan nga ginhatag sang Department of Health agud malikawan nga maglapta ang virus.
Base naman sa pagsulundan sang Department of Social Welfare and Development nagakadapat nga kompleto man ang mga dokumento antes mapanagtag ang ayuda kaangay nalang sang Simplified special amelioration card forms, master list nga pirmado sang City Social Welfare and Development Office, ukon Local Government Unit kag Municipal Social Welfare and Development office, listahan sang mga benepesyaryo nga pirmado sang Local Government Unit kag Department of Social Welfare and Development kag photocopy sang ID lakip man picture sang mga benepesyaryo samtang ginabaton ang ayuda.
