ILOILO CITY – Nagtaas ang insidente sang sunog sa Western Visayas sa una nga quarter sang tuig ipaanggid sang tinalikdan nga tuig bangud sa El Niño.
Sa interview sang Bombo Radyo kay Fire Supt. Crosbee Gumowang, Assistant Director for Operations sang Bureau of Fire Protection (BFP) 6, iya ginpahayag nga 628 ka mga fire incidentes gikan sang Enero tubtob sang Marso subong nga tuig ang na rekord sang ahensya ipaanggid sa 349 ka mga insidente lamang ang na rekord sa first quarter sang tinalikdan nga tuig.
Panugyan ni Gumowang, nagakadapat nga may yara na sang reserba nga tubig kag balas sa sulod sang balay; may yara sang exit way; ipa-tseksyar sa electricians ang mga kuryente; indi maggamit sang illegal connection; kag likawan ang pagsaksak sang madamo nga gamit.
Suno pa sa natungdan, kun kaisa bangud sa tuman ka init nga tuga sang El Niño mahimo man nga madamo sang sunog nga magaluntad sa subong nga tuig.
Magapabilin nga padayon ang kampanya sang BFP sa mga pumuluyo agud nga masigurado nga fire-safe ang mga komunidad sa rehiyon 6 sa idalom sang “Oplan Ligtas na Pamayanan”.
