LAMBUNAO, ILOILO – Nagdeklara sang state of calamity si Lambunao Iloilo Mayor Jason Gonzales sa nasambit nga lugar bangud sa halit nga gintuga sang ‘weak’ El Niño.
Sa interview sang Bombo Radyo kay Mayor Gonzales, iya ginpahayag nga nahalitan ang mga pananom sa ila nga banwa bangud sa mainit nga panahon subong.
Apektado man ang 3,588 ka mga mangunguma kag 4,140 ka mga household.
Suno kay Gonzales, kabug-osan nga P164 million ang kahalitan sang El Niño.
Dugang pa sang natungdan, lakip sa mga pananom nga apektado amo ang palay, mais kag saging.
Prayoridad sa subong sang alkalde amo ang tubig sa banwa bangud nga tuman na gid ka gamay sang mga water sources nga ginakuhaan.
Panugyan ni Gonzales sa mga pumuluyo, nagakadapat nga ipalab-ot sa punong barangay ang mga problema sa tubig ukon panaom agud nga mahatagan ini gilayon sang prayoridad sang munisipyo sa lugar.
