ILOILO CITY– Nabatun na sang Vallacar Transit Incorporated ang suspension order nga gindagdag sang Land Transportation Franchising and Regulatory Board (LTFRB) sa 10 nila ka mga bus units.
Ini ang kasunod sang pagkadagdag sang ceres bus sa pil-as sa Brgy. Igbucagay Hamtic Antique sa diin tatlo ang napatay lakip na ang maritime student nga bag-o lang naka graduate.
Sa interview san g Bombo Radyo kay Jane Seballos, legal and media relations manager sang Vallacar Transit Incorporated, iya ginpahayag nga ginahanda na nila ang mga requirements may kaangtanan sa gindagdag nga order sang LTFRB sa ila.
Suno kay Seballos natural lang nga kun may yara sang aksidente, patay ukon nakabunggo nagapapanaog sang suspension sang unit ang nasambit nga ahensya sang gobyerno.
Gin-athag man ni Seballos nga wala sang dapat problemahun ang riding public bangud magluwas sa nasambit nga suspended units, madamo man sila sang iban pa nga franchise nga mahimo mabyahe agud indi magtuga sang huol sa publiko.
Samtang ginpahayag man ni Seballos nga nagahatag man sila sang bulig kag kun ano pa ang kinahanglanon sa pamilya sang mga biktima .
Ginpahayag man ni Seballos nga tubtob subong, wala pa nila naistorya ang driver sang Ceres bangud dako ang damage sa baba sini kag mabudlay para sa iya ang maghambal rason nga ila pa hulaton ang abiso sang doctor.
