ILOILO – Nagsaka sa 10 ang patay bangud sa Dengue sa probinsya sang Iloilo.
Sa interview sang Bombo Radyo kay Dr. Ma. Socorro Quiñon, Provincial Health Officer 2 sang Provincial Health Office, iya ginpahayag nga naglab-ot sa 1,723 ka kaso sang Dengue ang na-record humalin sang Enero 1 tubtub May 11, 2019.
Pinakaulihi nga nagdugang sa listahan sang mga nagkalamatay amo ang pito ka tuig nga bata sa Pavia, Iloilo.
Kun pahat-pahaton ang listahan, ang banwa sang Pavia, Pototan, Sta. Barbara, New Lucena kag Banate ang may tag-isa ka patay, 3 sa Concepcion kag 2 sa Bingawan.
Ang mga banwa naman nga may pinakamadamu nga kaso sang Dengue amo ang mga masunod: Pototan nga may 152, Concepcion nga may 106, Calinog nga may 80, Pavia nga may 78, Sta. Barbara nga may 67, Sara nga may 66, Ajuy nga may 63, Bingawan kag New Lucena nga may 56 kag Lambunao nga may 56.
Bangud sini, hugot ang kampanya sang Provincial Health Office tuhoy sa pagpatuman sang 4S ukon ‘Search and Destroy’, ‘Secure Self Protection’, ‘Seek Early Consultation’ kag ‘Say Yes to Fogging agud nga matapna ang pagduging sang lamok nga ‘carrier’ sang Dengue.
