JANIUAY, ILOILO – Dakop ang tatlo ka mga lalaki sa pagbaligya sang mga indi lisensyado nga armas sa Janiuay, Iloilo.
Ang mga lalaki amo sanday Ceasar Mateo, 33 anyos kag Jimmy Priso, 35 anyos sang Tapaz, Capiz; kag JR Porras, 35 anyos sang Pototan, Iloilo.
Sa interview sang Bombo Radyo kay Police Major Dadje Delima, hepe sang Janiuay Municipal Police Station, iya ginpahayag nga may nagpadala sa ila sang impormasyon nga may yara sang baligyaanay sang armas nga nagakatabo sa sulod mismo sang public market sang banwa.
Gilayon naman nga gin-validate sang kapulisan ang impormasyon kag nadakpan ang tatlo ka mga lalaki sa diin na rekober ang duha ka calibre 45; tatlo ka empty magazine; short 12 gauge homemade shot gun; cellphone; motorsiklo kag belt bag.
Suno kay Delima, ang tagsa ka calibre 45 ang ginabaligya sang tatlo ka mga persona sa balor nga P12,000 tubtob P13,000.
Gin-ako man nanday Porras kag Priso nga madugay na sila nga nagabaligya sang armas sa diin nagahalin pa ang ila suplay sa Cebu City.
Pasakaan naman sang kaso nga paglapas sa Comelec Gun ban kag Republic Act 10591 ukon Comprehensive Firearms and Ammunition Regulation Act ang tatlo ka ma lalaki.
