ILOILO CITY – Love triangle ang isa sa mga ginatudlo rason sa pagluthang-patay sa empleyado sang Department of Agrarian Reform (DAR) sa Tagbak Jaro Iloilo City.
Ang biktima amo si Alan Salario, residente sang Calmay, Janiuay Iloilo kag nagatrabaho bilang Engineering Aid kag driver sang DAR Region 6.
Sa exclusive interview sang Bombo Radyo Iloilo kay Police Captain Eduardo Siacon Jr, hepe sang Jaro Police Station, iya ginpahayag nga santo sa ila imbestigasyon, natukiban nga may yara sang karelasyon si Salario nga isa ka babaye nga may bana.
Suno kay Siacon, antes mapatay si Salario, nakasugid ini sa iya pamilya nga sa tion nga mapatay ini, itudlo sini ang isa ka tawo nga wala pa ginpangalanan.
Ginkumpirma naman sang hepe nga may yara na sila sang mga pangalan nga ginakaptan nga makabig persons of interest sa krimen.
Sa subong, lantawon naman nila ang kuha sang closed circuit television (CCTV) agud matumod ang suspek sa pagpatay sa biktima.
