ILOILO – Nagapabilin sa gihapon sa hospital si Janiuay Iloilo Mayor-elect Frankie Locsin matapos gin-aresto sang National Bureau of Investigation (NBI) bangud sa kaso nga pagalapas sa Anti-Graft and Corrupt Practices Act.
Suno kay Atty. Jorge Jularbal, Regional Director sang NBI Region 6, tubtub subong, wala pa sang progress ang sitwasyon ni Locsin.
Indi man sini mapat-od kun san-o dal-on si Locsin sa Sandiganbayan.
Ginpahayag sini nga ginhatagan sang doktor sang antibiotic nga may mataas nga high dosage ang alkalde kag sa subong, nagapaayo pa ini kag indi pa ‘fit to travel’.
Samtang, indi pa makahatag sang pinal nga kumento ang Department of Interior and Local Government (DILG) sa kaso ni Locsin.
Sa interview sang Bombo Radyo kay DILG Region 6 Director Engr. Ariel Iglesias, iya ginpahayag nga wala pa sang pinal nga desisyon ang DILG central office sa nasambit nga kaso bangud hulaton pa nila ang desisyon sang Commission on Elections (Comelec).
Apang pag-abot sang Hunyo 30 kag yara sa gihapon sa hospital si Locsin, ang nagdaog nga bise alkalde nga si Ben Margarico amo ang magapungko bilang alkalde sang banwa sang Janiuay Iloilo.
Natukiban man nga may balatian si Locsin sa dughan kag may pneumonia.
Sa subong, yara ini sa The Medical City kag ginabantayan sang mga katapo sang NBI.
Matandaan nag-ugat ang kaso bangud sa pagbakal sang banwa sang Janiuay sang P15 million nga balor sang bulong halin sa Priority Development Assistance Fund ni Sen. Vicente Sotto III sang tuig 2001.
Ang medical supply contract ang gin-award sa AM Europharma, sa diin ang ila accreditation ang ginsuspend sang Department of Health (DOH).
Magluwas kay Locsin gin-convict man sang Sandiganbayan sanday municipal accountant Carlos Moreno Jr., budget officer Ramon Tirador, treasurer Luzviminda Figueroa, Ricardo Minurtio, kag Rodrigo Villanueva.
Ginpamatbatan man sang anti-graft court ang mga natungdan sang anom tubtub 10 ka tuig nga pagka preso kag ginpapanaugan sang perpetual disqualification from public office.
