ILOILO CITY – Indi magnubo sa 33 ka mga salakyan kag motorsiklo ang ginbakal sang Iloilo City Government sang tuig 2018 sa idalom sang pagpamuno ni outgoing Iloilo City Mayor Jose Espinosa III.
Sa interview sang Bombo Radyo kay Mr. Joren Sartorio, pinuno sang General Services Office (GSO), iya ginpahayag nga ang nasambit nga numero ang mahimo pa nga madugangan sa tion nga matapos na ang inventory.
Suno kay Sartorio, ang nasambit nga mga salakyan ang ginalakipan sang pick-up, motorsiklo, closed van, ambulansya kag fire truck.
Sa Mayor’s Office, may yara sang 15 ka mga multi purpose vehicle, 4 ka pick up kag 1 ka coaster; sa City Social Welfare and Development Office (CSWDO) may 2 ka hi lux; sa Beautification sa idalom sang City Agricultures Office, may yara sang 2 ka tricycle; sa City Treasurer’s Office, may yara sang duha ka motorsiklo kag sa City Disaster Risk Reduction and Management Office (CDRRMO), may 2 ka pick-up, 3 ka ambulansya kag 2 ka fire truck.
Ginpahayag ni Sartorio nga sa tion nga matapos na nila ang inventory, ila na nga ipagwa ang tanan nga balor sang ginbakal nga mga salakyan sang Syudad sang Iloilo.
