Tuman ang pagtimbuok sang kaso sang dengue sa Western Visayas.
Sa interview sang Bombo Radyo Iloilo kay Dr. Maria Lourdes Monegro, entomologist sang Department Health-Center for Health Development (DOH-CHD)- Region 6 , iya ginpahayag nga 198 % gid ang gintaas sang kaso sang dengue sa Rehiyon 6.
Suno kay Monegro, nagdangat na sa 8,613 ang kaso sang Dengue sa Western Visayas sa diin 48 diri ang napatay, umpisa Enero 1 tubtob Hunyo 2019.
Ini ang mas mataas kun ipaanggid sa 2,886 ka kaso kag 23 ang napatay nga narecord sang amo man nga period sang 2018.
Yari ang pinakaulihi nga data sang DOH-6: 1)Iloilo nga may 2,516 kag 12 ang napatay; 2)Negros Occidental nga may 2,277 kag 17 ang napatay; 3)Capiz nga may 1,245 kag 7 ang patay; 4)Aklan nga may 1,019 kag 5 ang patay; 5)Iloilo City nga may 555 kag 4 ang patay; 6)Bacolod City nga may 433 nga may isa ang patay; 7)Antique nga may 285 nga may 2 ang patay; 8)Guimaras nga may 187 kag wala sang narekord nga napatay
Suno naman kay Dr. Elvie Villalobos, cluster head sang Infectious and Emerging Diseases sang DOH-CHD 6, mas ginapasangkad pa gid nila ang kampanya agud mangin aktibo ang pumuluyo sa pagtuman sang 4S ukon Search & destroy mosquito breeding places, Self-protection, Seek early consultation,kag Say yes to fogging.
