ILOILO – Duha ka ‘bogus claims’ ang natukiban sang Philippine Health Insurance Corporation (PhilHealth) sa Western Visayas.
Ini ang may kaangtanan sa anomaliya nga ginakaulamiran sang PhilHealth sa diin ginmandu na ni Presidente Rodrigo Duterte ang paghalin sa pwesto sang mga opisyal sang nasambit nga ahensya.
Sa interview sang Bombo Radyo kay Jhanimhe Jalbuna, Public Relations Officer III sang PhilHealth-6, iya ginpahayag nga ang ‘bogus claims’ ang natukiban sa duka ka magkatuhay nga medical facility sa Negros Occidental.
Ang mga nasambit nga report suno kay Jalbuna ang ila na nga napalab-ot sa PhilHealth Central Office.
Ginpahayag ni Jalbuna nga sang ginproseso ang duha ka ‘bogus claims’, nagguwa sa ila system ang ang mga benepisyaryo ang patay na rason nga ini ang gin-deny.
Sa pihak sang kontrobersiya sa PhilHealth, ginpahayag sang natungdan nga sa subong, wala pa sila sang may nabaton nga mandu gikan sa Central Office tuhoy sa balasahay ukon may pahalinon nga empleyado sang PhilHealth 6.
