ILOILO CITY – Napun-an sang kasubo ang pagdumdom sang mga abyan, kakilala kag estudyante sang manunudlo nga si Alnie Dinah Pet Osano kasunod ang pagbunggo-patay sa ila sang iya bana nga si Joe Marie Osano sang Mazda MX5 sportscar sa Sen. Benigno Aquino Jr. Avenue Mandurriao Iloilo City.
Sa interview sang Bombo Radyo kay Mam Anabelle Sorilla, suod nga abyan kag kaupod nga manunudlo ni Mam Osano sa Ticud Elementary School, iya ginpahayag nga sang Byernes, ukon isa ka adlaw antes matabo ang aksidente, maluya ang biktima.
Nagareklamo man ang biktima suno kay Sorilla nga nakapoy na ini, apang wala ini makahibalo kun ano ang iya luyag nga ipabutyag.
Samtang suno naman kay Linda Bolido, lola sang isa sa mga estudyante ni Mam Osano, mabuot ini nga manunudlo.
Mahapos suno sa iya nga palapitan si Mam Osano sa diin kun ano ang problema,ginapangitaan niya ini gilayon sang solusyon.
Apisar strikta ini nga sahi sang manunudlo, apang maayo ini nga magtudlo sa klase.
Sang ang iya bana suno kay Lola Linda ang nangin presidente sang Parents Teachers Association (PTA), ginbuligan man ini sang bana ni Mam Osano nga si Sir Osano.
Naghilibion naman ang presidente sang Grade 6 nga mga estudyante ni Mam Osano sang magwa ang balita nga napatay ini.
Suno kay Maria Christina, tuman sila nga nasubuan sang iya mga classmates bangud sa pagbawi gilayon sang Diyos sang hulam nga kabuhi sang ila manunudlo.
Ginlaragway man sini bilang strikta nga sahi sang manunudlo si Mam Osano sa diin nagapati ang tanan kun ini ang maghambal.
Naglahog pa suno sa ila si Mam Osano nga indi maggwa sa ila eskwelahan kag indi maghampang sa taytay sang Caingin Lapaz,bangud posible nga mautod ini.
Magapabilin nga buhi sa huna-huna sang mga manunudlo kag estudyante ang legasiya nga natukod ni Sir Osan.
Sa interview sang Bombo Radyo Iloilo kay Maam Jocelyn Sasa, nagaserbi subong nga Officer in Charge sang La Paz II Elementary School, iya ginpahayag nga indi nila malimtan kun paano sila ginkabig nga pamilya ni Sir Osano.
Suno kay Maam Sasa, bilang isa ka principal, wala gid nagakataka nga maglibot sa eskwelahan agud kumustahon ni Sir Osano ang mga manunudlo kag ang mga estudyante.
Ginpahayag man niya nga kaangay sang isa ka abyan, si Sir Osano man ang ila dalangpan agud maghatag sa ila sang laygay tuhoy sa ila propesyon bilang manunudlo.
