ILOILO- Ginpasalamatan ni outgoing Iloilo Governor Arthur Defensor Sr. ang mga nagapanguna nga banwa sa Iloilo nga nagabayad sang buwis kadungan sang ginpatigayun nga awarding ceremony sang top 10 real property and business taxpayers kag best performing Municipalities in treasury and assessment services sa probinsya.
Suno kay Defensor, iya naapresyar ang ginahimo sang tagsa ka mga pumuluyo nga magbayad sang buwis lakip na ang tikang nga ginahimo sang mga treasurer sa tagsa ka banwa agud mapasigurado nga insakto ang pagkolekta sang buwis.
Pahayag pa sang gobernador, ang paghatag sang pasidungog sa mga banwa ang isa man ka pamaagi agud ipakita nga ginakilala sang Iloilo Provincial Government ang mga lihok sang tagsa ka banwa sa kolektahanay sang buwis.
Gin-athag man sang gobernador nga wala niya ginakuha ukon wala siya sang may ginkawat nga kantidad sa kaban sang Probinsya.
Samtang ginpahayag man ni Jean Maire G. Umadhay Provincial treasurer sang probinsya nga tuigan nga ginapatigayun ang nasambit nga kahiwatan.
Nagapatigayun man sila sang auction sa mga delinquent properties.
Ang mga hall of fame awardees naman suno kay Umadhay ang ginahatag sa mga kabanwahanan nga tatlo na ka beses nga nagapanguna sa tagsa ka kategorya sa patag sang kolektahanay sang buwis.
Gina-engganyo man niya ang iban pa nga mga municipal treasurers sa iban nga mga kabanwahan nga mangin matutom kag magpaninguha nga makolekta sang maayo ang buwis agud makaangkon man sang award kaangay sang iban nga mga banwa.
