Wala maswelduhan ang mga empleyado sang munisipyo sang New Lucena,Iloilo.
Sa interview sang Bombo Radyo Iloilo kay Vice-Mayor Erwin Sustento, iya ginpahayag nga tubtob subong wala marelease ang Hunyo 1 tubtob Hunyo 15 nga sweldo sang mga empleyado bangud wala sang municipal accountant nga magaasikaso sang payroll.
Suno kay Vice- Mayor Sustento, nagresign ang ila municipal accountant nga si Yasmin Gayasa sang Marso 1 kag tubtob subong wala pa sang na-appoint nga bag-o nga municipal accountant ang banwa.
Ginpahayag ni Gayasa nga wala sang Certified Public Accountant nga empleyado sang banwa nga mahimo magbulos sa nabakante nga posisyon nga ginbayaan ni Gayasa.
Samtang sa interview naman sang Bombo Radyo kay Mayor Christian Sorongon, iya ginpahayag nga sang nagresign si Gayasa, ginbuslan ini sang Marso 7,2019 ni Glyn Christian Tupas nagikan sa Provincial Accountant’s Office apang nagresign man sang Mayo 31 bangud nakabaton ini sang pagpamahog.
Suno kay Sorongon, gintuyo man nila nga mag designate sang OIC Municipal Accountant apang nag-abiso suno sa iya ang Civil Service Commission nga indi dapat mag-appoint sang isa ka Municipal accountant nga indi Certified Public Accountant.
Ginatugyan nalang ni Sorongon sa masunod nga administrasyon ni incoming Mayor Leicel Mondejar Seville ang nasambit nga problema sa sweldo sang mga empleyado.
Nahibaluan nga naka-leave pa tubtob sa Hunyo 30 si Sorongon samtang magapungko naman si Vice mayor Sustento bilang acting Mayor sa Hunyo 25 tubtob 30.
