Gindepensahan ni Bacolod City Rep. Greg Gasataya ang iya ginfile nga House Bill No. 569 nga naga- ban sang pagsugod sang klase antes ang 8:30 sa aga sa mga eskwelahan sa idalom sang Department of Education (DepEd) kag Commission on Higher Education (CHED).
Sa interview sang Bombo Radyo kay Cong. Gasataya, iya ginpahayag nga katuyuan sang hagna nga hatagan sang prayoridad ang pisikal, mental kag sosyal nga aspeto sang estudyante paagi sa sistema sang edukasyon nga nagahatag sang interes kag igtalupangod sa ikaayong lawas kag seguridad sang mga estudyante.
Suno kay Gasataya, pila man ka mga rason nga dapat ikonsiderar kun ngaa paborable ang nasambit nga hagna amo ang estado sang transportasyon, ang kabug-at sang workload sa idalom sang K-12 curriculum, kag ang access sa mga buluthuan ilabi na sa mga malayo nga lugar nga mahimo magbutang sa alang-alang sa seguridad sang mga estudyante.
Pananglitan nga mangin layi,ginpahayag sang mamalidha nga bentaha ini sa mga manunudlo, mga ginikanan kag mga estudyante bangud mangin mas malawig ang oras nga sila ang makapreparar kag maatenderan ang iban pa nga katungdanan sa pamilya kag puluy-an.
Samtang, gin-athag sang kongresista nga wala ginatudluan sang hagna ang kabataan nga magtinamad ,sa baylo, makabulig ini sa development kag husto nga pagdako sang kabataan bangud sa dugang nga oras sa ila pagtulog.
Dugang pa ni Gasataya, base sa mga pagtuon, mas nagaperform sang maayo ang mga estudyante kun indi tuman ka aga nga nagasugod ang ila klase.
