ILOILO CITY – Naga-ugtas na ang Department of Public Works and Highways – Iloilo City Engineers Office sa mga nagasablag sa mga dalanon sa Syudad sang Iloilo.
Sa interview sang Bombo Radyo kay Engr. Rodney Gustilo, pinuno sang Iloilo City District Engineering Office, iya ginpahayag nga madugay na mga problema ang mga motorista nga naga parking sa mga ginpalapad nga dalan sa diin maathag nga paglapas ini sa Philippine Highway Act.
Suno kay Gustilo, katuyuan kuntani sang pagpalapad sang dalan amo nga mangin matalunsay ang dalagan sang mga salakyan.
Apang sa gihapon daw wala sang pulos ang road widening bangud ginahimo man ini nga parkingan.
Ginhalimbawa na ni Gustilo ang bahin sang Rizal Pala-Pala 2 sa likod sang Iloilo Terminal Market (Super) sa diin nagagutok sa gihapon ang mga salakyan apisar ginpalapad na ang dalan.
Gin-athag man ni Gustilo nga indi sila makapangdakop sang mga salakyan bangud katungdanan ini sang Land Transportation Office kag sang Transportation Management and Traffic Regulation Office sa idalom sang Public Safety and Transportation Management Office.
Nagapanawagan man si Gustilo sa mga Punong Barangay nga magpanguna sa pagsaway sa mga motorista nga naga parking sa mga dalanon nga ginpalapad sa ila nasakupan nga lugar.
