ILOILO CITY – May yara sang Memorandum Circular gikan sa Land Transportation Franchising and Regulatory Board Central Office ang pagpahamtang sang labing una nga premium point to point bus service hub sa Iloilo Business Park sa Mandurriao, Iloilo City.
Ini ang kasunod sang pagkwestyon sang mga transport group tuhoy sa ginapahayag madasig nga paghatag sang pahanugot sang nasambit nga ahensya nga makapahamtang sang premium point to point bus service hub.
Sa interview sang Bombo Radyo kay Atty. Ma. Josette Abellar, legal counsel sang Land Transportation Franchising and Regulatory Board 6, iya ginpahayag nga may yara sang Memorandum Circular 2019-010 nga ginpaguwa ang central office kag ini ang napetsahan sang Marso 5, 2019.
Suno kay Abellar, nakasaad sa nasambit nga memorandum circular nga ginamandu-an ang mga regional office nga magbukas sang point to point bus service.
Sila sa regional office 6 suno kay Abellar ang makabig lamang nga implementing agency sa nasambit nga mandu.
Katungdanan nila suno kay Abellar amo ang pagbaton sang mga kwalipikado nga aplikante nga amo ang pagahatagan sang prangkisa agud nga maka-operate.
