ILOILO CITY- I-review sang bag-o nga Iloilo City Council ang franchise nga gin-grant sang konseho sang tinalikdan nga administrasyon sa tatlo ka mga water utilities sa Syudad sang Iloilo.
Sa interview sang Bombo Radyo kay Iloilo City Councilor Jay Treñas, chairman sang Committee on Public Utilities, iya ginpahayag nga katuyuan sini nga mausisa kun husto ang nangin proseso sang paghatag sang prangkisa sa tatlo ka mga water utilities nga ginalakipan sang Earth Water System, South Balibago Resources, Inc. (SBRI),kag Prime Water nga amo ang naga-provide sang tubig sa syudad.
Suno kay Treñas, ini bangud nga may mga natabo nga pagpasaka sang kaso sa tunga sang nasambit nga mga water utilities kag Iloilo City Government may kaangtanan sa isyu sang pag- grant sang franchise.
Ginpahayag ni Treñas nga bilang isa sa mga konsehal nga ginpasakaan sang kaso sadto, nagakadapat nga mas mangin istrikto ang syudad sa paghatag sang prangkisa sa ano man nga public utilities agud malikawan ang kaangay nga mga sitwasyon.
Gindugang pa niya nga kuntani magserbi ini nga wake-up call sa bag-o nga mga myembro sang Iloilo City Council agud siguraduhon nga insakto ang proseso sa pag-grant sang franchise.
Ginklaro naman sang konsehal nga indi nila luyag nga maapektuhan ang dalagan sang water distribution sa syudad sang Iloilo, sa baylo, luyag lang nila nga mangin legal kag matalunsay ang sistema sang water distribution sa syudad.
