Nahatagan na sang mga foodpacks ang mga stranded nga mga pumuluyo sa banwa sang Carles kag Concepcion.
Nahibaluan nga siyam na ka adlaw nga stranded ang mga residente kasunod sa pagdeklara sang pagpa untat sang byahe sang mga motorbanca bangud sa gale warning kun sa diin nagaamat-amat na nga nagakaubos ang ila supply sang pagkaon.
Sa interview sang Bombo Radyo kay Nenette Pador, pinuno sang Provincial Social Welfare and Development office, iya ginpahayag nga madamo na nga mga tawo ang nakabaton sang ginpanagtag na nga mga foodpacks halin sa Iloilo provincial government.
Suno kay Pador, padayon ang pagpadala nila sang mga pagkaon kag nagkalain lain nga kinahanglanon sang mga tawo.
Dugang pa sang natungdan, magluwas sa pagpanagtag sang mga food packs, personal man nga nagpadulong si Iloilo Governor Arthur Defensor Jr. agud idul-ong ang mga nasambit nga donasyon.
Samtang suno kay Concepcion Mayor Dr. Raul Bañas, nangin mabudlay ang kabuhi sang mga residente sa sulod sang siyam ka adlaw bangud sa ginakulang nga mga supply sa ila nga banwa.
Gani nagpalab-ot sila sang pagpasalamat sa donasyon nga ginhatag kag gin dul-ong sang gobernador sa nasambit nga banwa.
Suno kay Mayor Bañas nagalaom sya nga mahatag man sang dugang pa nga mga ayuda nga halin sa nagkalain lain nga ahensya bangud ginakulang man sa gihapon ang supply sang mga residente sa ila nga banwa.
