MIAGAO, ILOILO-Hugot nga ginapamatukan sang University of the Philippine- Visayas student council ang pagdeploy sang katapo sang militar sa sulod sang campus.
Sa interview sang Bombo Radyo kay Angelica Del Rosario, tagpamaba sang University of the Philippine-Visayas University Student Council, iya ginpahayag nga ginadumilian ang pagsulod sang suldado kag Police sa unibersidad para man sa seguridad sang estudyante.
Suno kay Del Rosario, indi nila luyag nga maipit sa kun ano man ang nagapatunga sa mga katapo sang militar kag sang New Peoples Army.
Gin-athag man ni Del Rosario nga indi front sang makawala nga grupo ang mga organisasyon sa ila unibersidad.
Kun sa bahin naman sang pag-upod sa hublag protesta, may yara sila sang system-wide coordinated actions kag wala ginapilit ang mga estudyante nga magpakigbahin.
Nagahingyo man si Del Rosario nga kun tani untatan na ang pag red tag sa ila sang militar.
