ILOILO CITY-Ginkalipay sang pamunuan sang Iloilo City Police Office ang pagpabutyag sang suporta sang Iloilo City Government sa ginaduso nga ideklarar ang Communist Party of the Philippines- New People’s Army bilang persona non-grata sa syudad sang Iloilo.
Sa interview sang Bombo Radyo kay Pol. Col. Martin Defensor Jr., iya ginpahayag nga mas positibo ang iya panan-awan subong bangud ginabuylugan ni Mayor Jerry Treñas ang nasambit nga tikang sang kapulisan.
Suno kay Defensor, kinahanglan nga mag-ugyon ang tanan nga sektor sang komunidad sa pagkondenar sang mga kalakasan nga ginahimo sang mga rebelde.
Ginpahayag ni Defensor, ini agud nga madula na ang ginatuga nga pagpamahog sang mga makawala nga grupo sa mga pumuluyo sa syudad.
Gindugang pa niya nga kun matabo ini, mas maka focus ang Iloilo City Police Office sa pagtapna sa mga kriminalidad sa syudad sang Iloilo.
Matandaan nga ini na ang ikaduha nga bes nga ginduso ni Defensor ang nasambit nga tikang sa diin wala ini nagmadinalag-on sadtong administrasyon ni anay Mayor Jose Espinosa III.
