ILOILO CITY – Luyag ni Iloilo City Councilor Ely Estante nga pangitaan sang win-win solution ang pagsolbar sang problema tuhoy ginareklamo nga kompetisyon sa tunga sang mga fish vendor sa mga public market sa syudad sang Iloilo kag mga manugbaligya sa Iloilo Fish Port Complex.
Ini ang kasunod sang pagsinapol nga ginpatawag ni Estante kaupod ang mga manugbaligya sa syudad sang Iloilo kag ang mga tiglawas gikan sa Local Economic Enterprise Office, Iloilo Fish Port Complex, Fisheries Development Authority kag Licensing and Permit Division.
Sa interview sang Bombo Radyo kay Estante, chairman sang Committee on Market and Slaughterhouse, iya ginpahayag nga iya ginduso kay Mr. Charlie Chan, presidente sang Market Vendors Association sa syudad sang Iloilo, nga magpadala sang position paper kay Mr. Alexis Inocentes nga Officer-In-Charge sa Iloilo Fish Port Complex.
Suno kay Estante, ang existing brokers, vendors kag buyers sa Iloilo Fish Port Complex ang indi na mapahalin santo sa pahayag ni Inocentes.
Ini bangud nga ang negosyo sa Iloilo Fish Port Complex ang yara sa gab-i samtang ang negosyo naman sa mga merkado sa syudad sang Iloilo ang natuon sa aga.
Sa pagkamatuod suno kay Estante, ang tanan nga mga salakyan nga nagasulod sa Iloilo Fish Port Complex ang nagabayad sang buwis sa City Treasurer’s Office samtang kinahanglan naman nga maggawad sang sanitary permit ang tanan nga mga food vendor para sa safety sang customers.
Sa pihak sang ginareklamo sang fish vendors, ginpahayag sang natungdan nga kinahanglan nga may yara sang win-win solution ang Iloilo City Government agud nga indi man maapektuhan ang palangabuhi-an sang mga manugbaligya.
