ILOILO CITY – Ginpangunahan ni Iloilo City Mayor Jerry Treñas ang pagsaulog sang 82nd Charter day Celebration sa syudad sang Iloilo subong nga adlaw.
Ang 82nd Charter Day subong nga 2019 ang may tema nga “Responsive and Responsible Governance”.
May kaangtanan diri, may yara sang misa nga ginpatigayon sa Iloilo Freedom Grandstand sa pagpanguna ni Dr. Raymund Edsel Alcayaga, kura paroko sang San Jose Placer Parish.
Pagkatapos sang misa, may programa nga ginpatigayon sa Iloilo Freedom Grandstand nga ginpangunahan ni Mayor Treñas, Iloilo City Lone District Congresswoman Jam Jam Baronda kag mga Iloilo City Councilor.
Magluwas diri, nagtambong man ang mga Punong Barangay sa syudad sang Iloilo kag mga empleyado sang Iloilo City Hall.
Kadungan sang programa, naghatag sang mensahe sanday Treñas kag si Cong. Baronda.
Suno kay Treñas, ang pagsaulog sang Charter Day subong nga tuig ang mangin simple lamang bangud man sa natabo nga Dengue outbreak kag ang makalahanusbo nga Iloilo Strait tragedy.
Kadungan sini, ginpapahanumdom man ni Treñas ang tanan nga magbuligay agud nga mapa-uswag ang syudad sang Iloilo.
Isa man sa ginhatagan sang igtalupangod sang alkalde amo ang pagtinlo sang Iloilo River kag ang pagpanami sang Iloilo Esplanade Project.
