ILOILO– Indi maka-apekto ang Lakbay Aral sang mga Punong Barangay sa syudad sang Iloilo sa ginapatigayon nga road clearing operation.
Patigayunon ang Lakbay Aral sa palaabuton nga Setyembre 3 tubtob 7 sa Subic, Bataan kag Olongapo City kun sa diin hibaluon sang mga Punong Barangay ang mga best practice sang mga nasambit nga lugar.
Sa interview sang Bombo Radyo kay City Department of Interior and Local Government Officer Atty. Roy Defiño, iya ginpahayag nga magluwas sa mga Punong Barangay, may yara man sang nabilin nga barangay officials nga magapatigayon sang road clearing.
Suno kay Defiño, indi man magdugay ang Lakbay Aral sang mga Punong Barangay rason nga nagakadapat nga padayunon ang pagpanghawan sa mga dalanon.
Samtang, ginpaathag man ni Defiño ang kaundan sang ginpaguwa nga memorandum ni Department of Interior and Local Government Secretary Eduardo Año natuhoy sa road clearing.
Suno kay Defiño, ang Oplan Hawan ang indi lang katungdana sang mga alkalde kundi katungdanan man ini sang mga barangay official.
