ILOILO CITY – Nagdangat sa 13 ka mga kabataan ang nasikop sang Task Force on Moral and Values Formation kaupod ang Women and Children’s Protection Desk sa Iloilo Terminal Market.
Sa interview sang Bombo Radyo kay Nestor Canong, pinuno sang Task Force on Moral and Values Formation, iya ginpahayag nga narescue nila ang mga kabataan sa sulod sang Iloilo Terminal Market.
Suno kay Canong, magapatigayun sang initiation sang bag-o nga miyembro ang nasambit nga grupo.
Nahibaluan na nila suno kay Canong ang nasambit nga plano bangud may yara sang isa ka katapo sang task force ang nag-apply agud mahibalu-an ang initiation.
Samtang suno naman kay Police Captain Shella Mae Sangrines, tagpamaba sang Iloilo City Police Office, iya ginpahayag nga nagapasalamat siya sa mga opisyal sang mga barangay nga nakapalibot sa Iloilo Terminal Market bangud sa ginhimo nga tikang sa pagsikop sa mga menor den edad nga nagalapas sa curfew for minors.
Ginpahayag ni Sangrines nga sa 13 ka kabataan nga katapo sang grupo, isa diri ang babayi.
Igakustodiya naman sang Women and Children Protection Desk ang nasambit nga mga kabataan.
Nagpanawagan man si Sangrines sa mga ginikanan nga kun tani sikupon ang ila mga kabataan sa tion nga magpatak ang 10:00 sang gab-i ukon ang curfew for minors bangud indi man mabantayan isa-isa sang mga opisyal sang barangay kag sang mga barangay tanod ang mga kabataan.
