ILOILO CITY – Ginakabig ni Iloilo City Mayor Jerry Treñas nga welcome development ang kapin sa P12 billion nga investment sang San Miguel Corporation sa Western Visayas.
Sa interview sang Bombo Radyo kay Treñas, iya ginpahayag nga magapahamtang sang bottling company kag brewery sa Leganes, Iloilo kag lime industry sa Guimaras ang nasambit nga kompaniya.
Suno kay Treñas, nagapakita lamang ini nga may yara sang pagsalig sa Western Visayas ang mga investor.
Ginpahayag ni Treñas nga ang pagpahamtang sang bottling company, brewery kag lime industry ang makatuga sang madamu nga trabaho kag makapa-uswag sa ekonomiya sang rehiyon.
Bangud nga ginakabig nga sentro sang negosyo ang syudad sang Iloilo, ginpahayag sang alkalde nga makabulig sa ekonomiya ang nasambit nga investments.
Sa maabot nga Setyembre 20, natalana ang ground breaking ceremony sa banwa sang Leganes.
Samtang, ginpahayag naman ni Treñas nga buhi sa gihapon ang ginaduso nga pagpasangkad sang Iloilo Port.
Suno kay Treñas, ginahitso sa gihapon ang proseso tuhoy sa ginaduso sang International Container Terminal Services Inc. nga P8.7 billion upgrade sa nasambit nga pantalan.
Kun madayon suno sa alkalde ang nasambit nga proyekto paagi sa Private Public Partnership, daku ang mabulig sini sa ekonomiya sang Iloilo bangud nga makadungka na ang mga dalagku nga barko gikan sa luwas sang pungsod.
