ILOILO CITY – Nagsulat na ang Barangay Council sang North Baluarte, Molo, Iloilo City kay Iloilo City Mayor Jerry Treñas agud nga mapahalin ang illegal settlers nga nagatinir sa bakante nga lote nga pahamtangn kun tani sang Material Recovery Facility.
Sa interview sang Bombo Radyo kay Punong Barangay Marites Morga sang nasambit nga lugar, iya ginpahayag nga iya na lang nga ginahulat nga aktuhan sang Iloilo City Government ang nasambit nga request.
Suno kay Morga, may napahalin na nga mga pumuluyo nga nagatinir sa nasambit nga lote apang may pila sa gihapon ang wala nakahalin.
Mas makapaayo suno kay Morga nga ang Task Force Anti-Squatting and Illegal Structures Unit na ang magpatigayon sang Oplan Hawan sa nasambit nga lugar.
Sa subong suno kay Morga, ang mga basura ang ginasulod nila sa sako ukon plastic kag ginahigtan agud nga indi maglapta.
Magluwas diri, adlaw-adlaw man nga ginakuha sang basurero ang mga basura agud dal-on sa dumpsite apang mas makapaayo kun tani kun sa labing madali nga tion, maumpisahan na ang pagpatukod sang Material Recovery Facility.
Magluwas sa Material Recovery Facility, ipahamtang man sa bakante nga lote ang parking space kag ang Barangay Tanod outpost.
Samtang, tuhoy naman sa pagpatuman sang Oplan Hawan, ginpahayag ni Morga nga madamu sang mga ulugtasan nga mga driver nga nagaparking sang ila salakyan sa higad sang dalan.
Bangud nga padayon ang clearing operation, ginpahayag ni Morga nga kinahanglan nga padulungan sang Oplan Hawan team ang ila lugar agud nga masolusyunan ang problema sa obstruction.
Mas makapaayo man suno sa natungdan kun ipaguyod na lang sa tow truck ang mga salakyan nga nagasablag sa dalan.
Gindepensahan man ni Morga ang Lakbay Aral nga patigayunon sa Setyembre 3 tubtob 7 sa Subic, Bataan kag Olongapo City.
Suno kay Morga, wala sang malain sa Lakbay Aral bangud nga may yara man sang natun-an ang mga naga-upod nga barangay official.
Bilang isa sa mga maga-upod sa nasambit nga aktibidad, ginpahayag sang Punong Barangay nga indi man malikawan nga may dala nga pagpanglugayawan ang Lakbay Aral.
Indi lang matumod ni Morga ang specific nga proyekto nga iya natun-an sa Lakbay Aral apang sa iya pila na ka tuig nga pag-upod sa nasambit nga aktibidad, madamu na siya sang proyekto nga napatuman para sa kaayuhan sang ila lugar.
Sa pihak sini, ginpahayag sang natungdan nga ang Lakbay Aral ang kasubong nga konswelo bangud nga wala man sang day-off ang trabaho sang isa ka barangay official.
