ILOILO CITY – Ang mas ginpasangkad nga police operation ang isa sa mga rason kun nga-a nagnubo ang krimen sa Western Visayas humalin sang Enero tubtub Agosto subong nga tuig.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga humalin sang Enero 1 tubtub Agosto 27, 2019, naglab-ot lamang sa 18, 533 ang krimen sa rehiyon kag mas manubo sang 143 kun ipaanggid sa nakaligad nga tuig sa kasubong man nga period.
Isa sa mga rason suno kay Malong amo ang pagpatuman sang Enhance Managing Police Operations sa diin ginpasidunggan ang Police Regional Office 6 bilang best unit.
Ginpahayag ni Malong nga decreasing trend ukon nagapanubo ang tanan nga sahi sang krimen sa rehiyon bangud man sa ginpasangkad nga patrol operations sa tagsa ka mga lugar.
Sa Western Visayas, ginpahayag sang natungdan nga mas gintutukan ni Police Regional Office 6 Director Police Brigadier General Rene Pamuspusan ang pagtapna sa illegal drugs.
Ini ang rason kun nga-a, nadugangan sang 15 million ang 23 million nga balor sang illegal drugs nga nakuha sa anti-illegal drug operation.
Samtang, pagatutukan man sang Police Regional Office 6 ang internal cleansing sa diin ginapatuman sa
subong ang Squad System.
Suno kay Malong, paagi sa Squad System, magaduha-duha na ang isa ka pulis nga maghimo sang gamo ukon kontrobersiya.
Ini bangud nga sa idalom sang Squad System, maumid ang mga kaupod sa trabaho sang involved nga pulis.
Ginhalimbawa ni Malong ang natabo nga pagpahubog kag pagbato sang duha ka pulis sa ila hepe sa Pototan Municipal Police Station kun sa diin ginpaidalom liwat sa training ang iban sa ila mga kaupod.
Sa pihak sini, ginpahayag sang natungdan nga ang numero sang pulis nga naulamid sa kontrobersiya ang tuman ka gamay kun ipaanggid sa numero sang mga maayo nga pulis.
Bilang kabahin sang internal cleansing, may yara man sang ginapatigayon nga random mandatory drug test agud nga mahibalu-an kun nagagamit sang illegal drugs ang mga pulis.
May yara man sang mandatory drug test sa mga pulis nga naga-apply para sa promotion ukon ang mga magapaidalom sa schooling.
