ILOILO– Ginpasigurado sang MORE Electric and Power Corporation nga handa na sila nga mag operate bilang bag-o nga power distributor sa syudad sang Iloilo.
Ini ang kasunod sang pagbasura sang Kongreso ang franchise renewal application sang Panay Electric Company.
Sa interview sang Bombo Radyo kay Mr. Roel Castro, President kag Chief Executive Officer sang MORE Electric and Power Corporation, iya ginpahayag nga tinghuaan nila nga himuon ang tanan agud mahatagan sang maayo nga serbisyo ang mga pumuluyo.
Samtang, may kaangtanan naman sa plano nga pagpasaka liwat sang franchise application sang Panay Electric Company, ginpahayag ni Castro nga ginatahod nila ini apang madamo sang butang nga dapat ikonsiderar bag-o mahatag ang nasambit nga application.
Suno kay Castro, nagakadapat nga ipaathag sang Panay Electric Company ang rason kun nga-a dapat nga hatagan sila liwat sang prangkisa.
Kun basehan ang nangin desisyon sang Kongreso sa ginpatigayon nga hearing kahapon nga adlaw, maathag nga ginbasura na ang franchise renewal application.
Itugyan na lang nila ang desisyon sa Kongreso kag sa Legislative Franchise suno kay Castro ang tuhoy sa ginahingyo sang Panay Electric Company.
