DUEÑAS, ILOILO- Nadakpan na ang duha sa lima ka ginapahayag mga menor de edad nga suspek sa pagpanghimulos sa isa ka dalagita sa Brgy. Poblacion, Dueñas, Iloilo.
Sa interview sang Bombo Radyo kay Police Captain Samuel Vipinosa, hepe sang Dueñas Municipal Police Station, iya ginpahayag nga mismo ang biktima nga si Alyas Den-den sang Passi City, Iloilo ang nag-identity kag nagtudlo sang puluy-an sang mga suspek.
Suno kay Vipinosa, sang ila ginpadulungan ang puluy-an sang mga suspek, duha lamang sa ila ang nag-surrender samtang at large naman ang tatlo ka iban pa.
Ginpahayag naman ni Vipinosa nga gina-validate pa nila ang impormasyon nga indi na menor de edad ang tatlo ka suspek nga at-large.
Ginturn-over naman sa Department of Social Welfare and Development ang duha ka nag-surrender nga suspek nga nagaedad 15 tubtob 17 anyos.
Sa subong, ginahulat nalang sang otoridad ang resulta sang medical examination sa biktima agud mahibaluan kun ginhimuslan gid man ini kag pasakaan na sang kaso ang mga suspek.
