ILOILO CITY- Gin-athag sang Department of Trade and Industry nga indi lang ang pagtaas sang presyo sang gatong ang basehan sang pagtaas man sang presyo sang nagapanguna nga balaklon.
Ini may kaangtanan man sa pagtaas sang presyo sang petrolyo bangud sa pag-atake sa duha ka Saudi oil facilities nga nagresulta sa pagnubo sang supply sang gatong sa world market.
Sa interview sang Bombo Radyo kay Department of Trade and Industry -6 Regional Director Rebecca M. Gascon, iya ginpahayag nga indi automatic nga magasaka ang presyo sang basic commodities kun magsaka ang produkto sang petrolyo.
Suno kay Gascon, naga-contribute man ang suplay sang mga raw materials.
Halimbawa suno sa iya amo ang pagnubo sang suplay sang tamban nga nagapanguna nga raw material sa paghimo sang canned sardines.
Kun magnubo ang suplay sang nasambit nga isda, magasaka ang presyo sang sardinas.
Sa subong suno kay Gascon, wala pa sila sang na-monitor nga pagsaka sang presyo sang nagapanguna nga produkto sa Iloilo.
Samtang, iya ginkumpirmar nga may mga manufacturers sang canned meat, sardines kag noodles nga nagpasa sang petition para sa pagpasaka sang presyo.
Ini nga petition suno kay Gascon ang tun- an sang maayo antes aprubahan sang Department of Trade and Industry.
Apang santo sa pagsulundan, indi mahimo nga magpasaka sang presyo nga lapaw sa 10% sang Standard Retail Price.
Nagpanugyan man ini sa mga konsumidor nga dapat usisaon ang mga produkto nga ginabakal agud nga indi magkadto sa uyang ang kwarta.
Suno sa iya, mas maayo nalang nga mataas ang presyo sang ginabakal nga produkto basta maayo ang kalidad sa baylo nga barato apang indi man sigurado.
