ILOILO CITY- Yara na sa Civil Service Commission para sa review kag rekomendasyon ang ginaalegar masobra sa 100 ka mga midnight appointments sa Iloilo City Hall.
Sa interview sang Bombo Radyo kay Iloilo City Mayor Jerry Treñas, iya ginpahayag nga santo sa natukiban sang task force nga nag-imbestiga sa nasambit nga alegasyon, naglab-ot sa 118 ka mga midnight appointments ang narecord sa administrasyon ni anay Mayor Jose Espinosa III.
Suno kay Treñas, ini nga mga appointments ang nagalakip sang mga promosyon sa diin kalabanan diri ang kwestiyonable sa diin may yara sang gulpi lang nga
nagtaas ang posisyon.
Samtang, wala pa nabaton ni Mayor Treñas ang kaso nga ginpasaka ni Rosita Celiz Camacho sang Zone 2, San Juan, Molo, Iloilo City kag Special Operations Officer 3 sa Iloilo City Hall batok sa iya kag sa iban pa nga empleyado.
Suno kay Treñas, nakibot man siya sang nabatian ang kaso nga Grave Coercion, Anti-Graft and Corrupt Practices Act, Grave Misconduct kag Oppression nga ginpasaka ni Camacho batok sa iya kag kanday Iloilo City Administrator Melchor Tan, Executive Assistant kag Assistant Iloilo City Administrator Noel Panaguiton, Iloilo City Government Assistant Department Head 2 Josephine Agudo kag Iloilo City Human Resource Management Officer Leo Elevencione bangud sa paghimbunanay sang nakaligad nga May 13 midterm elections.
Apang suno sa alkalde,handa siya nga sabton ini sa tion nga mabaton na sang iya opisina ang nasambit nga kaso.
Matandaan nga ginpahayag ni Camacho nga gin-angot siya nga nagsuporta kay anay Iloilo City Mayor Jose Espinosa III kag ginatudlo nga bagwoman sang anay alkalde sa P100 million nga kantidad bilang kabaylo sa indi pagkontra kay Treñas sa pagka-alkalde.
Ginpanindugan naman ni Treñas nga isa si Camacho nga nagkampanya sa kandidatura ni Espinosa.
