ILOILO CITY – Nangin “blessing in disguise” ang kontrobersyal nga ulihi nga pagpasar sang budget sang Iloilo Provincial Government agud mahibalu-an ang insakto nga proseso sang pagpatigayon sang annual budget sang probinsya subong nga tuig.
Suno kay Iloilo 1st District Board Member Marcelo Valentine Serag, “more efficient” na ukon mas maayo ang pagpatigayon sang mga plano para sa budget sang probinsya.
Iya ginpahayag nga sang nagligad nga tuig, ulihi na sang mahibaluan nga madamo pa sang mga opisina sa Iloilo Provincial Government ang may mga kwarta nga wala pa nagasto.
Subong nga tuig, suno kay Serag, ginaamat-amat na niya basa ang Annual Investment Plan sang Probinsya.
Kangot sa kapaslawan sang probinsya sang Iloilo nga maangkon ang ikalima nga Seal of Good Local Governance gikan sa Department of Interior and Local Government, ginpahayag ni Serag nga mas importante gihapon ang serbisyo kaangay sa health, social, kag iban pa ipaanggid sa anuman nga pagpasidungog.
Dugang ni Serag, sila nga mga board members ang handa man magkooperar sa mga proyekto sang Iloilo Provincial Government agud mapasanyog ang probinsya.
Tapos na ang politika suno sa iya kag dapat hatagan pagtamod ang pagserbisyo sa tawo.
