ILOILO- Target sang Sangguniang Panlalawigan nga mapasar ang 2020 annual budget sang probinsya sang Iloilo antes ang Christmas break.
Ini matapos nga ginpatigayon ang ulihi nga session sang budget hearing sa committee level sang Sangguniang Panlalawigan.
Sa interview sang Bombo Radyo kay 4th District Board Member Domingo Oso, chairman sang Committee on Appropriation, iya ginpahayag nga plastado na ang tanan nga budget sa tagsa ka opisina sa Iloilo Provincial Government.
Suno sa iya, ginapreparar na lang ang report antes ini ipasa sa plenaryo sang Sangguniang Panlalawigan sa masunod nga mga inadlaw.
Nahibaluan nga yara sa P3.029-billion para sa General Fund kag P1.060-billion para sa Local Economic Enterprise proposed 2020 budget sang probinsya.
Samtang, ginsabat naman ni Oso ang tuhoy sa delay nga pagpasar sang 2019 budget nga amo ang ginabasol kun ngaa wala nakabaton sang Seal of Good Local Governance ang Probinsya.
Suno kay Oso, indi lamang ang delay sa pagpasar sang budget ang rason kundi may iban pa.
Ini ginalakipan sang kapaslawan nga mautilize ang 20 % sang 2017 internal revenue allotment component; kapaslawan sa full utilization sang performance challenge fund;kapaslawan nga ma-meet ang criteria sa organized kag convened local disaster risk reduction and management council;kag wala man ma-
meet ang criteria nga 50% sang fund utilization sang 70% component sang 2018 local disaster risk reduction and management fund.
