ILOILO – Amat-amat nga naklaro ang resulta sang imbestigasyon sang Regional Internal Affairs Services 6 sa kamatayon ni Adonis Hontiveros nga ginluthang patay sa isa ka checkpoint sa banwa sang Sara, Iloilo.
Sa interview sang Bombo Radyo kay Atty. Samson Go, pinuno sang Legal Division sang Regional Internal Affairs Services 6 kag nagaserbe man nga summary hearing officer sang nasambit nga kaso iya ginpahayag nga natapos na ang ikaduha nga clarificatory hearing nga gintambungan sang apat ka pulis nga imbolbado sa insidente sang pagpangluthang.
Suno kay Go, ang apat ka mga kapulisan ang indi kabahin sang ginpresentar nga witness sang mga respondent bangud desisyon sang Regional Internal Affairs Services 6 nga ipatawag sila.
Sa subong suno sa natungdan, may yara na sang resulta nga mahimuan na sang resolusyon apang ipagwa lang ini kun makapasa na sang position papers ang duha ka bahin.
Dugang sang natungdan, ipasa ang resolusyon sa deciding person nga si Pol Brig Gen Rene Pamuspusan.
Ginalauman nga matapos ang imbestigasyon sa kaso ni Hontiveros sa katapusan sang bulan.
