ILOILO CITY- Indi na pagpahanugutan ni Iloilo City Mayor Jerry Treñas nga ipaidalom sa mercy killing ukon euthanasia ang mga stray dogs nga madakpan sang City Veterinary Office.
Sa interview sang Bombo Radyo sa alkalde, iya ginpahayag nga nakibot na lang ini nga gin-anunsiyo ang impormasyon nga ipaidalum sa mercy killing ang mga ido nga sa pagpakamatuod, wala ini makonsulta sa iya kag sa mga konsehal.
Suno pa sa alkalde, mabakal anay ang syudad sang salakyan para sa City Veterinary Office agud nga magamit sa pagpangdakup kag mapahimo pa ang syudad sang dog pound sa diin ibutang ang mga madakpan nga mga ido antes pa man maghimo sang mga tikang kag plano nga mauntat ang problema sa mga stray dogs.
Sa subong suno kay Treñas, may yara sang mga cause oriented groups nga nagapakig-angut sa syudad nga interesado nga mag – adopt sang mga ido nga madakpan sang syudad.
Nagpanawagan naman ang natungdan sa mga pumuluyo sang syudad nga mangin responsable sa ila nga mga hinuptanan nga ido.
Samtang ginpahayag naman ni Iloilo City Councilor Jay Trenas nga may yara na sang nagaeksister nga ordinansa nga napasar sa City Council nga nagamandu sa mga barangay nga magtukod sang dog pounds ukon temporary holding areas apang wala pa ini nag-take effect sa subong.
Dugang pa sang konsehal, maayo nga butang man nga nalakip sa ginatalakay nga mga isyu sa kahanginan ang plano nga mercy killing sa mga ido bangud madamo sang mga cause oriented group/ animal welfare group nga nagpabutyag sang interes nga mag a-dopt sang mga ido.
Apang sunu sa iya, padayon ang iya nga panawagan sa implementasyon sang nasambit nga ordinansa kag sa pagtukod sang city dog pounds.
