ILOILO CITY- Madamo sang problema nga ginalantaw ang Iloilo City Council kun ngaa indi pa matigayon ang pagregulate ukon pag-grant sang franchise sa mga e-tricycles agud legal nga makabyahe sa Syudad sang Iloilo.
Sa interview sang Bombo Radyo kay City Councilor Rommel Duron, chairman sang Committee on Transportation sa konseho, iya ginpahayag nga isa sa mayor nga rason amo nga wala gihapon nahuman ang transport route plan sa syudad sang Iloilo nga sang 2017 pa kuntani natapos apang wala madayon bangud sa kakulang sang pondo.
Suno kay Duron, indi madali-dali ang paghimu sang transport route plan bangud nga kinahanglan anay ini nga tun-an sang maayo.
Nangin problema man ang pag-convert sang city roads agud mangin national roads rason nga mabudlay ang paghimo sang route plan.
Magluwas diri, may yara man sang naga-eksister nga moratorium gikan sa Department of Transportation kag Department of Interior and Local Government tuhoy sa pagpanghatag sang prangkisa sa mga motorized kag non-motorized tricycle.
Suno kay Duron, madula lamang ang moratorium kun mahitso na ang pangkabug-usan nga transport route plan sa syudad sang Iloilo.
Ginpahayag naman ni Duron nga hingagawon nila ang pagpasar sang ordinansa nga magatukod sang Tricycle Franchising and Regulatory Board nga amo ang magatalupangod sa tanan nga mga concerns natuhoy sa prangkisa sang mga tricycle sa syudad.
