ILOILO CITY- Ginakabig nga dako nga problema sang Syudad sang Iloilo ang nagadamo na gid nga mga hospital wastes apang wala sang treatment kag disposal facility.
Sa interview sang Bombo Radyo Iloilo kay Mr. Noel Hechanova, pinuno sang City Environment And Natural Resources Office, iya ginpahayag nga ini ang naistoryahan sa ginpatigayon nga meeting upod sa tagdumalahan sang mga ospital sa syudad kag kay Iloilo City Councilor Ely Estante, chairman sang Committee on Environment sa konseho.
Suno kay Hechanova, nag-ugat ang problema matapos gin-suspend sang Environmental Management Bureau ang license to operate sang kompanya nga upod sang syudad sa joint venture nga amo ang may pasilidad para sa hospital wastes treatment and disposal nga nahamtang sa Calajunan, Mandurriao bangud sa kakulang sa requirements.
Sa subong suno kay Hechanova, mabudlay kag magasto ang pagdispose sang mga hospital waste bangud kinahanglan pa ini nga dal-on sa Cebu kag sa Luzon sa diin may pasilidad ang nasambit nga kompaniya.
Nagalaum naman si Hechanova nga mapangitaan sang pamaagi sang technical working group agud mapadasig ang paghatag sang permit sang Environmental Management Bureau agud mangin operational liwat ang nasambit nga pasilidad para sa disposal sang hospital wastes bangud tuman ini ka delikado sa publiko kun indi madumala sang husto.
