ILOILO CITY- Ginadumilian ang kapulisan nga kumpiskahon ang mga vape nagikan sa sin-o man nga ila madakpan nga naga gamit sini sa pampubliko nga lugar.
Sa interview sang Bombo Radyo kay Pol Lt Col Joem Malong, tagpamaba sang Police Regional Office -6 , iya gin-athag sa ila command conference nga ang sin-o man nga madakpan nga nagagamit sang vape ang iga-invite sa police station, i-booking kag i-release lang kag ibalik man sa iya ang vape.
Suno kay Malong, indi naman kinahanglan nga magpagwa sang memorandum ang Police Regional Office -6 bangud may yara na nga daan sang memorandum ang national headquarters kag na-dessiminate naman ang impormasyon.
Nahibaluan nga humalin sang Nobyembre 21- 23, may yara na sang ginpatigayon nga 371 tanan nga mga operations sa bilog nga rehiyon sa diin 8 ang nadakpan nga ginalakipan sang 3 sa Aklan, 1 sa Antique, kag 4 sa Syudad sang Iloilo.
Naglab-ot naman sa 99 tanan ka mga vape stores ang gin bisitahan sang mga kapulisan.
