GUIMARAS- Naka alerto na ang Provincial Disaster Risk Reduction and Management Council sa Probinsya sang Guimaras sa paglaslas sang Bagyo Tisoy.
Ini ang kasunod man sang pagpaidalom sa nasambit nga isla sa Tropical Cyclone Wind Signal No. 1.
Sa exclusive interview sang Bombo Radyo kay Vice Gov. John Edward Gando, kag acting Governor sang Guimaras, iya ginpahayag nga nakapatigayon na sang information dissemination ang Provincial Disaster Risk Reduction and Management Council sa tanan nga mga barangay sa lima ka mga banwa sa Guimaras nga ginabug usan sang Jordan, Buenavista, Nueva Valencia, Sibunag kag San Lorenzo.
Samtang, ginapahanumdom man ni Gando nga sundon ang mando sang Philippine Coast Guard nga indi mahimo maglayag ang mga pumpboat kag manugpangisda nga may magagmay nga sakayang pandagat.
Ginatugyan naman ni Gando sa mga mayor sang kada banwa ang pagkansela sang klase sa ila mga nasakupan nga eskwelahan.
