ILOILO CITY- Napirmahan na ni Mayor Jerry Treñas ang agreement sa tunga sang Panay Electric Company kag Iloilo City Government sa ila nga real property tax payment.
Ini matapos nga naaprubahan sang City Council ang resolution nga nagahatag sang authority sa iya nga pirmahan ang nasambit nga kasugtanan nga nagakahulugan nga indi na madayon bwas ang auction sale sang propiedad sang Panay Electric Company.
Sa interview sang Bombo Radyo kay Mayor Treñas,ginpa- check na niya ini gilayon sa City Legal Office para madasig man nga ma- endorso sa City Council para sa ila confirmation.
Suno kay Treñas, nagsapol man ini sa City Legal Office kaina sang aga agud nga i-request si Atty. Edgar Gil nga mag-file na sang motion for early resolution sa Local Board of Assessment Appeal para nga masukot na nila ang nabilin nga sulokton sa Panay Electric Company nga yara sa 40 million para sa interest kag penalidad bangud nag-pending na iini sa sulod sang duha ka tuig.
Nagasalig man ang syudad suno sa alkalde nga masukot ang kapin P 40 million gikan sa Panay Electric Company bangud nga mapag-on ang posisyon sang syudad nga kun nasarangan nga magbayad sang Panay Electric Company ang ila principal payment, imposible nga indi sini masarangan ang interes.
Samtang,kasunod sang pagbayad sang Panay Electric Company, ginpahayag ni Treñas nga may yara na sang pondo ang syudad para sa health kag social services nga i-allocate para sa mga ospital kag health centers sa sa syudad sang Iloilo.
Apang suno kay City Treasurer mr. Jinny Hermano ang 46.9 million pesos gikan sa P134-M nga ginbayad sang Panay Electric Company ang i-allocate para sa special education fund.
Sa nabilin nga 87 million, 30 percent diri ang ihatag sa barangay ukon 26.13 million nga tungaon sa 180 barangays ukon P145,000 ang batunon sang kada barangay.
Ang nabilin naman nga 61 million ang i allocate sa general fund.
